Mae tîm ymchwil rhyngwladol wedi dadorchuddio teclyn deallusrwydd artiffisial arloesol i fesur lefelau hapusrwydd cenedlaethol amser go iawn.
Y teclyn arloesol hwn, a elwir yn Gross National Happiness.Today (GNH.Today), yw'r cyntaf o'i fath ac mae’n addo cynnig gwybodaeth werthfawr am les cymdeithasol yn fyd-eang.
Yn wahanol i ddulliau traddodiadol sy'n dibynnu ar arolygon cyffredinol, mae GNH.Today yn defnyddio deallusrwydd artiffisial synhwyro torfol i ddarparu cipluniau dyddiol o hapusrwydd cenedlaethol.
Mae synhwyro torfol yn cynnwys casglu data gan nifer mawr o unigolion trwy eu ffonau symudol a dyfeisiau eraill. Mae'r data a ddefnyddir yn agored i'r cyhoedd, gan sicrhau preifatrwydd a chysyniad. Mae'r dull yn darparu safbwynt cyflawn amser go iawn o deimladau'r cyhoedd heb darfu ar breifatrwydd unrhyw un.
Teclyn arloesol GNH.Today yw'r cyntaf i fesur hapusrwydd cenedlaethol heb ddibynnu ar ddata cyfryngau cymdeithasol. Yn hytrach, mae'n defnyddio ymagwedd unigryw i ddadansoddi geiriau sy'n gysylltiedig ag emosiwn o amryw o ffynonellau ar-lein, megis chwiliadau Google, i ddarparu ciplun mwy manwl a chywir o deimladau'r cyhoedd.
Mae'r mynegai hapusrwydd yn amrywio o 0 (digalondid eithafol) i 10 (hapusrwydd eithafol).
Amlygodd cyd-arweinydd y prosiect Dr Frédéric Boy o Sefydliad Zienkiewicz Prifysgol Abertawe arwyddocâd y datblygiad: "Mae GNH.Today yn chwyldroi'r ffordd rydym yn deall lles cymdeithasol trwy gynnig data mewn amser go iawn, teclyn allweddol i lunwyr polisi a newyddiadurwyr.
"Mae ffyrdd traddodiadol o fesur llwyddiant cenedlaethol, yn benodol dangosyddion economaidd, wedi'u beirniadu ers amser maith am eu hanallu i ddal gwir hanfod lles pobl. Dros y 50 mlynedd diwethaf, mae gwledydd y Gorllewin wedi ceisio mynd i’r afael â’r bwlch hwn drwy arolygon hapusrwydd rheolaidd. Fodd bynnag, mae bwrlwm cyflym bywyd modern a'r cynnydd mewn technoleg symudol wedi gwneud y dulliau arafach hyn yn llai perthnasol Mae GNH.Today yn darparu asesiad deinamig ar unwaith."
Cred yr ymchwilwyr bod y dechnoleg hon yn cynrychioli cam sylweddol ymlaen at fesur cynnydd cymdeithasol. Trwy gasglu data ffynhonnell agored, mae GNH.Today yn gosod y sylfaen am lywodraethu mwy empathig drwy gynnig mesur tryloyw a dibynadwy o hapusrwydd cenedlaethol.
Dywedodd Yr Athro Talita Greyling o Brifysgol Johannesburg a Dr Stephanie Rossouw o Brifysgol Technoleg Auckland: "Gyda GNH.Today rydym yn symud tuag at ymagwedd fwy holistaidd at lywodraethu, lle mae lles dinasyddion yn derbyn y sylw mae'n ei haeddu. Bydd y teclyn hwn yn helpu gwneuthurwyr penderfyniadau ar draws y byd wrth greu polisïau sy'n gwella ansawdd bywyd a bydd hefyd yn helpu newyddiadurwyr a sefydliadau dyngarol i ddeall ac ymateb i anghenion y boblogaeth yn well."